Allir søguligir bygningar verða fluttir. Aðrir verða bara javnaðir við jørðina og so verður bygt nýtt.
Eini 20.000 fólk búgva í Kiruna, norðasta býnum í Svøríki, og býurin hevur ligið har, hann liggur, í eini 120 ár. Men eitt nám sum útvinnur jarnmálm liggur nær við býin, og nú er tað komið so nær, at vandi er fyri at lendið skal smokka undir býnum, og tí má býurin flytast tríggjar kilometrar, hava myndugleikarnir gjørt av.
Námið undir Kiruna er eitt tað størsta í heiminum, og tí er ikki bara sum at siga tað at gevast. 90% av øllum jarnmálmi í ES kemur frá náminum, sum staturin eigur og rekur undir navninum Luossavaara-Kiirunavaara AB (LKAB). Hvønn dag kemur nóg nógvur málmur úr náminum, til at byggja seks Eiffeltorn, skrivar dr.dk.
Námið kom fyrst, býurin aftaná, og tí er tað býurin sum má víkja fyri náminum, verður sagt. Í fyrstu syftu verða 6.000 fólk flutt til eitt nýtt heim, og sum skilst verður alt gjørt í fullari semju ímillum fólk á staðnum og námsfelagið.
Um tú veitst okkurt, sum VP ikki veit - skriva so til vp@vp.fo