Helvtin av tingmanningini hjá Tjóðveldi verður við, tá Vága Tjóðveldisfelag hevur aðalfund í Beitinum í Miðvági í annaðkvøld, mikukvøldið 17. mars.
Formligi aðalfundurin byrjar kl. 18.30, og har er millum annað uppskot til nýggjar viðtøkur á skrá. Eftir formliga aðalfundin – umleið kl 19.30 – verður politiskt orðaskifti, har Bjørt Samuelsen, løgtingskvinna, og Sirið Stenberg, løgtingskvinna og næstforkvinna floksins, verða við.
Floksformaðurin Høgni Hoydal skuldi eisini verið við, men hann hevur fingið forfall. Av somu orsøk er hann eisini farin í farloyvi úr Løgtinginum, og í hansara stað er Ingolf S. Olsen, varatingmaður og valevni floksins í Vágum, komin.
Hann situr eisini í nevndini hjá Vága Tjóðveldisfelag og verður sjálvandi eisini við á fundinum í annaðkvøld. Tískil verða trý av seks tingfólkum Tjóðveldis við á aðalfundinum/politiska fundinum í Beitinum í annaðkvøld.
Um tú veitst okkurt, sum VP ikki veit - skriva so til vp@vp.fo