WikiLeaks stovnarin, Julian Assange, kann vænta sær ein drúgvan fongsulsdóm, um hann verður útflýggjaður til USA. Hann hevur annars í dag tapt eitt mál ímóti júst USA sum vil hava hann útflýggjaðan. Ein kærudómstólur í London hevur gjørt úrskurð, skrivar Reuters. Dómstólurin sigur, at tað eru ikki nóg haldgóð prógv fyri, at Julian Assange verður í nøkrum vanda, um hann verður útflýggjaður.
Í USA er 50 ára gamli Julian Assange ákærdur fyri brot á lógina um njósning, tí hann í 2010 almannakunngjørdi fleiri 1000 skjøl um kríggið í Irak og Afghanistan.
Julian Assange flýggjaði í 2013 inn á sendistovuna hjá Ekvador, men 11. apríl 2019 varð hann við valdi togaður út av sendistovuni av bretsku løgregluni og settur fastur.
Um tú veitst okkurt, sum VP ikki veit - skriva so til vp@vp.fo
