Okkara ungdómur er hart raktur av koronakreppuni. Tey mistu fyrst várið og skúlan, sambandið við vinirnar – og nú missa tey eisini arbeiðið.
Longu áðrenn almennu tilráðingarnar komu í sambandi við koronakreppuna, fór Tórshavnar kommuna undir at gera ymsar tillagingar, fyri at halda arbeiðnum í kommununi í gongd.
Hetta varð fyrst og fremst gjørt við at framskunda hóp av umvælingararbeiðum, og síðan at framskunda fleiri íløgur í kommununi, soleiðis at steðgur ikki kom í og fólk kundu varðveita sína inntøku.
Og vit síggja longu nú effektina av tiltøkunum, nú tølini vísa, at inntøkuvøksturin hjá kommununi fyri apríl mánaða var 7%.
Ungdómsarbeiðini eru serliga innan tænastuvinnuna, sum er harðast rakt av kreppuni. Vit mugu tí beinanvegin inn at fyribyrgja stórum arbeiðsloysi millum ungdómin í summar.
Hetta kann kommunan til dømis gera við at víðka konseptið við tiltakinum “Ung í arbeiði”, so at skipanin eisini kemur at umfata ungdómar yvir 16 ár.
Nú ræður um at standa saman at fyribyrgja arbeiðsloysinum millum tey ungu í summar, og tí er kommunan farin undir hetta arbeiði nú, soleiðis at vit kunnu fara í gongd sum skjótast.
Annika Olsen
borgarstjóri
Hetta er eitt lesarabræv. Meiningar og sjónarmið í lesarabrævinum eigur tann ið skrivað hevur. VP leggur nógv í talu- og skrivifrælsi. Tí eru allar meiningar vælkomnar, bara tær eru innanfyri karmarnar á revsilógini og fjølmiðlaetisku leiðreglunum. VP loyvir í ávísan mun dulnevndum lesarabrøvum, tá veit redaktiónin hvør hevur skrivað.
Um tú veitst okkurt, sum VP ikki veit - skriva so til vp@vp.fo