Í sambandi við, at Billund Lufthavn hevur boðað frá, bíðirøðirnar við trygdareftirlitið verða longri, tí at myndugleikarnir hava hert krøvini, so sigur Vága Floghavn, tá ið VP spyr, at myndugleikarnir eru væl nøgdir við trygdareftirlitið á flogvøllinum í Sørvági.
- Vit hava seinastu árini uppraðfest trygdareftirlitið á flogvøllinum, og hava gjørt tær neyðugu íløgurnar í útbúgving og tól, soleiðis at vit til eina og hvørja tíð liva upp til krøvini hjá myndugleikunum á økinum.
- So ferðafólk fara ikki at merkja nakað til longri bíðitíð her á staðnum, sigur Jákup Sverri Kass, stjóri í Vága Floghavn í viðmerking til VP.
Fyri stuttari tíð síðan fekk Vága Floghavn ein talgildan boardingkort-skannara og í hesi vikuni kemur ein skannari til handviðførið afturat, soleiðis at trygdareftirlitið verður skjótari enn í dag.
Um tú veitst okkurt, sum VP ikki veit - skriva so til vp@vp.fo
