Nú samfelagið er í undantaksstøðu, vil Tórshavnar býráð gera sítt til, at hjólini mala víðari. Býráðsfundur verður mánakvøldið, har býráðið fer at viðgera ein virksemispakka til vinnulívið.
Ellivu mál eru á skrá til býráðsfundin. Talan er um mál, sum øll skulu skapa virksemi í kommununi beinanvegin, nú búskaparferðin í Føroyum er minkað munandi vegna koronasmittuna.
Millum málini á skrá er ein játtan til fótbóltsvøllirnar í Gundadali. Talan er um 5 mió.kr, sum verða framskundaðar.
Íløgur verða eisini gjørdar í lendisgøtur. Og so verða 5 mió.kr eisini játtaðar til orkusparandi tiltøk í kommunalum bygningum.
Umframt framskundaðar íløgur verða ymiskar størri umvælingar framskundaðar. Støða skal eisini takast til nøkur byggiloyvi og nýggja avtalu um Visit Nólsoy.
Aftrat hesum eru størri umvælingararbeiði á dagstovnum, frítíðarskúlum og skúlum longu sett í verk.
Býráðsfundurin byrjar kl.19:30 mánakvøldið, og øll kunnu fylgja við á torshavn.fo, har hann verður stroymdur.
Skráin fyri býráðsfundin sæst her.
Um tú veitst okkurt, sum VP ikki veit - skriva so til vp@vp.fo