Skrásett eru yvir 1 millión deyð í sambandi við koronu í teimum 53 londunum sum hoyra undir Evropa-skrivstovuni hjá Heims Heilsustovninum (WHO).
Tað kunnaði WHO-sjefurin Hans Kluge um á einum tíðindafundi í dag, sambært útlendskum miðlum.
Kluge vísti eisini á, at vandin fyri at fáa blóðtøpp er størri hjá teimum sum fáa covid-19, enn hjá teimum sum hava fingið AstraZeneca vaksinuna. Fleiri lond, harímillum Danmark, hava steðgað brúkinum av vaksinuni av vandanum fyri blóðtøppi.
– Eingin ivi skal vera um at AstraZeneca-vaksinan effektivt reduserar innleggingar á sjúkrahús við covid-19 og talið av teimum sum doyggja, segði Kluge. WHO viðmælir tí vaksinuna, skrivar NRK.
Um tú veitst okkurt, sum VP ikki veit - skriva so til vp@vp.fo
