15 ára gamli drongurin sum varð handtikin eftir ein skottilburð í eini handilsmiðstøð í Malmø í Svøríki fyrradagin hevur nú játtað seg sekan. Eitt fólk doyði av skotunum og eitt annað fekk álvarsligan skaða, tað stendur tó ikki um lív hjá viðkomandi.
Svenska útvarpið upplýsir, at alt bendir á, at drápið var eitt slag av uppgerð ímillum tvey stríðandi harkalið í brotsmannaumhvørvinum í býnum. Tann dripni varð limur í einum av hesum harkaliðunum, og hevði júst sitið ein dóm uppá 5 ár, tá hann varð fyribeindur av 15 ára gamla dronginum.
Hin sum fekk álvarsligan skaða var ein kvinna úr einum øðrum norðurlandi, sum var á vitjan í Malmø.
Svenskir miðlar skriva, at helst fær unglingin viðgerðardóm á lukkaðum stovni fyri kriminellar unglingar, og hesin dómurin verður í mesta lagi 4 ár.
Um tú veitst okkurt, sum VP ikki veit - skriva so til vp@vp.fo
