Tað er við eyðmýkt at eg takki hjartaliga fyri sýnda álitið at verða valdur til formann í Fólkaflokkinum.

Hesa stóru uppgávu taki eg á meg við stórari gleði.

Flokkurin hevur verið í tungum sjógvi. 

Men vit eru framvegis sami flokkur, sum tit valdu til seinasta val. Vit eru ein borgarligur og frílyntur flokkur, sum byggir á kristnu vesturlendsku virðini.

Ongum nýtist at ivast í, hvar vit standa. Nú standa vit saman lið um lið til frama fyri okkara flokk og okkara politikk.

Fólkaflokkurin hevur í hesi samgongu fingið nógv av skafti. 

Fiskivinnan hevur fingið tryggar og støðugar karmar og longu nú sæst, at risa íløgur verða gjørdar í fiskivinnuni. Tað eru framvegis avbjóðingar í heimaflotanum. Fólkaflokkurin fer at leggja stóran dent á at veita hesum týðandi partinum av flotanum hollar og varandi karmar.

Vit hava rokkið stórum málum á almannaøkinum. Øll lóggávan er dagførd og er eisini tryggjað okkara pensionistum meira at liva fyri.

Ferð er eisini sett á bygging av neyðugum stovnum at hýsa okkara borgarum við serligum tørvi. Ein bústaðarpakki er samtyktur, og nú verður ferð sett á íbúðabyggingina.

Á samferðsluøkinum eru tikin stór tøk í hesum samgonguskeiðinum.

Tunlarnir norður um Fjall eru í gerð, og skjótt verður sett á at bora til Fámjin. 

Á fíggjarøkinum er samtykt trygg skipan við tilfeingisgjøldum, sum fylgir gongdini í marknaðarprísum. Eisini er samtykt skattalóggávu í samband við vinningi í sambandi við sølu av fiskirættindum. Henda lóggáva krevur tillagingar, og hesar eru vit í løtuni við at avgreiða.

Eg ætli mær beinanvegin saman við okkara ting- og landsstýrismanning og í tøttum samstarvi við okkara bakland, at seta í gongd arbeiðið at orða okkara framtíðarpolitikk. 

Tað er mín vón, at vit fremja ætlanirnar, sum blivu stungnar út í samgonguskjalinum, eins og arbeiðið við nýggjari valskrá verður avgreitt í góðari tíð, áðrenn komandi val.

Fari at heita á lokalfeløg og veljarar kring alt landið at standa saman um okkara flokk, soleiðis at Fólkaflokkurin aftur verður størsti flokkur á komandi vali.

Christian Andreasen, formaður Fólkafloksins