Tað vóru granskarar frá amerikansku kjarnorkubumbu verkætlanini, "The Manhattan project" sum seinni stovnaðu felagsskapin "Bulletin of the Atomic Scientists" sum millum annað hevur funnið uppá dómadagsklokkuna.

Hon kom í 1947, og vísti tá 23:53, tað vil siga 7 minuttir í midnátt. Síðani tá er klokkan stillað 24 ferðir.

Orsøkin til, at klokkan nú er nærri midnátt enn nakrantíð er ikki bara russiska álopið á Ukraina, men eisini alheims koronafarsóttin og veðurlagskreppan.

Ikki færri enn 10 nobelheiðurslønarvinnarar eru í nevndini, sum tekur avgerðir viðvíkjandi klokkuni.

Rachel Bronson, sum er forseti í "Bulletin of the Atomic Scientists" sigur í samband við seinastu dagføringina, at avgerðin at flyta klokkuna ikki var løtt at taka.

- Vit liva í eini tíð við vandum, sum mannaættin ongantíð áður hevur sæð, og vit heita inniliga á allar leiðarar um at brúka allar møguleikar til at tosa um tingini og brúka diplomati, sigur hon millum annað í samband við at klokkan varð flutt.

Til samanberingar kann nevnast, at í 1953, tá USA royndi sína fyrstu brintbumbu, var urið flutt til 2 minuttir í midnátt. Og í 2018 elvdi økti spenningurin ímillum eystur og vestur til, at urið var sett til 100 sekund í midnátt.

Longst frá midnátt var hon í 1991. Tá stóð klokkan á 17 minuttir í midnátt, eftir at Berlinmúrurin var fallin, Sovjetsamfeldið var farið í søguna, týsklondini vórðu sameind aftur og nýggj avtala varð gjørd um at minka talið á kjarnorkuvápnum.

Les meira um "Bulletin of the Atomic Scientists" og dómadagsklokkuna her