Løgingið setir hol á viðgerðina av fleiri lógarmálum á tingfundinum sum byrjar klokkan 11 í dag.
Landsstýrið eigur øll málini.
Magnus Rasmussen, landsstýrismaður, eigur uppskotið um at broyta reglurnar um sundurbýti av eldri bygningum í eigaraíbúðir. Og Bárður Nielsen, løgmaður, eigur málið um at umskipa Kærustovnin, so kærunevndini í lendismálum, Vinnukærunevndini og Skuldarumskipanarnevndini verða avtiknar. Eins og ríkislógartilmælið um at seta í gildi fyri Føroyar Anordning om ikrafttræden for Færøerne af lov om ændring af lov om Folketingets Ombudsmand.
Páll á Reynatúgvu, tingmaður, vil vita ymiskt viðvíkjandi negativu rentuni, eitt nú hvussu nógva inntøku, bankarnir hava fingið av henni og ymsum avgreiðslugjøldum og annað hesum viðvíkjandi.
- Ilt gerst verri, tá kundin, sum eigur lívið í bankanum, hjálparleysur stendur og hyggur at, meðan íleggjararnir fara avstað við hart vunnu og uppspardu krónunum, sigur tingmaðurin millum annað í fyrispurninginum, sum tingið altso atkvøður um í dag.
Skráin sæst her, og til ber eisini at fylgja við beinleiðis.
Um tú veitst okkurt, sum VP ikki veit - skriva so til vp@vp.fo