Føroyska hondbóltslandsliðið hevur í dag skrivað søgu, tí hóast Føroyar taptu við fimm málum ímóti Eysturríki, so er samlaða støðan tann, at Føroyar eru við í EM endaspælinum, sum verður í januar.
Føroyar taptu útidystin ímóti Eysturríki í dag við fimm málum. Endaliga støðan gjørdist 38-33.
Føroyar vóru aftanfyri allan dystin, og fyri tað mesta við fleiri enn teimum fimm málunum.
Men tað var í veruleikanum ein annar dystur, sum hevði størri áhuga hjá føroyingum.
Av tí at Ukraina, sum Føroyar vunnu ruddiliga á heimavølli, skuldi vinna dystin ímóti Rumenia við minst 8 málum, skuldu teir koma framum Føroyar, var sjálvsagt stórur áhugi fyri, hvussu gekst har. Endin var, at Ukraina vann við fimm málum á Rumenia.
Sostatt hava Føroyar vunnið seg í EM endaspælið fyri fyrstuferð nakrantíð.
Um tú veitst okkurt, sum VP ikki veit - skriva so til vp@vp.fo