Sum heild stendur verri til nú við fólkaræðinum í heimsins londum enn tað gjørdi seinast tankasmiðjan hjá The Economist kannaði málið.

Economist Intelligence Unit (EIU) er tankasmiðja sum er tætt knýtt at miðlinum The Economist, og hvørt ár gera tey upp og skriva eina frágreiðing.

Noreg hevur fyrsta plássið, Nýsæland annað plássið, Finnland triðja og Svøríki fjórða plássið. Ísland er nummar fimm og Danmark nummar seks á listanum yvir bestu fólkaræði í heiminum.

Hugt verður millum annað at opinleika í stjórn og hjá myndugleikum annars, borgararættindum, hvussu framsagnarfrælsið hevur tað eins og frælsið at savnast í bólkum. Myndin er ikki heilt ólík henni sum hevur verið undanfarin ár.

Verður hugt at heimsins londum annars er støðan tíverri versnað. Sambært EIU er lutfallið av heimsins íbúgvum, sum liva í onkrum slagi av fólkaræði, minkað úr 49,4% til 45,7%. Og eisini her er koronafarsóttin ein partur av orsøkini. Fólk hava livað við stórum avmarkingum í sínum frælsi og eisini hevur farsóttin elvt til størri polariseringar.

- Í nógvum londum er gjógvin ímillum tey, sum taka undir við avmarkingum sum serfrøðin mælir til og tey, sum vilja hava størri frælsi og minni uppíblanding frá myndugleikunum blivin størri undir farsóttini, verður sagt.