Formaðurin í Tjóðveldi segði við Útvarpið, at hann væntaði Fólkaflokkurin eisini fer at taka undir við at reisa misálit á Jenis av Rana, men tað fer Fólkaflokkurin ikki.
- Tað er brot á allar fólkaræðisligar reglur, um landsstýrismaðurin í uttanríkismálum skrivar undir avtaluna um radaran uttan um løgtingið, segði Høgni Hoydal, sum eins og Bjarni Kárason Petersen í Framsókn sær eitt misálit á landsstýrismannin sum einasta møguleika, skrivar KVF.
VP hevur spurt formannin í Fólkaflokkinum, Christian Andreasen, um Fólkaflokkurin fer at taka undir við einum møguligum misáliti á Jenis av Rana, formann í einum av samgonguflokkunum og uttanríkismálaráðharri, men tað fer Fólkaflokkurin ikki.
- Fólkaflokkurin hevur onga ætlan um misálit á Jenis av Rana, sigur Christian Andreasen.
Christian Andreasen vísir á, at málið um radaran verður viðgjørt í landsstýrinum og í uttanlandsnevndini.
Um tú veitst okkurt, sum VP ikki veit - skriva so til vp@vp.fo
