Russiska olju- og gassfelagið Gazprom fer at skrúva fyri gassveitingini til Týsklands, fyribils í tríggjar dagar, tí neyðugt er at gera ymiskt viðlíkahaldsarbeiði uppá gassleiðingina, sigur felagið.
Talan er um Nord Stream 1 gassleiðingina, og hetta kemur eftir, at gassveitingin longu er minkað sera nógv seinastu tíðina, so hon nú bert er ein brotpartur av tí, hon plagdi at vera.
Týskland er sera bundið av russiskum gassveitingum, ikki minst tí nógv húsarhald brúka gassið til at hita íbúðirnar.
Týskir politikarar siga, at Russland roynir at revsa Týskland, sum hevur sett tiltøk í verk ímóti Russlandi síðani álopið á Ukraina. Russland sigur, at viðlíkahaldsarbeiðið fer at taka longri tíð enn vanligt, tí tiltøkini ímóti Russlandi gera, at tað er trupult at skaffa eykalutir.
Um tú veitst okkurt, sum VP ikki veit - skriva so til vp@vp.fo