Iranski forsetin Ebrahim Raisi er ikki ein maður sum rennur aftaná fjølmiðlunum, men herfyri eydnaðist kortini víðagitna CNN journalistinum Christiane Amanpour at fáa eina avtalu um samrøðu, í samband við at iranski forsetin er hjástaddur á ST aðalfundinum sum er í  New York í hesum døgum.

Christiane Amanpour ætlaði millum annað at seta Ebrahim Raisi spurningar um ófriðin í Iran, har ein 22 ára gomul kvinna herfyri doyði tá hon var í varðhaldinum hjá moralpolitinum, tí hon ikki vildi fjala hárið. Fólk í Iran siga, at kvinnan doyði, tí politiið fór so illa við henni.

Stutt áðrenn samrøðan skuldi vera komu boð frá forsetanum um, at tað bleiv ongin samrøða uttan so, at kvinnuligi journalisturin fjaldi hárið undir samrøðuni.

Men har gongur markið.

- Vit eru í New York, her er hvørki lóg ella siðvenja at fjala hárið við turriklæði, sigur Christiane Amanpour, sum sostatt lat samrøðu vera samrøðu.

Hon hevur annars áður fjalt hárið tá hon hevur gjørt samrøðu við iranskar stjórnarleiðarar. Tað gjørdi hon í 1998, tá hon gjørdi samrøðu við Mohammad Khatami, sum tá var forseti. Men tann samrøðan var gjørd í iranska høvuðsstaðnum Teheran.