Metingarnevndin hjá Norðurlandaráðnum metti, at Jens-Kjeld Jensen í Nólsoy skuldi fáa umhvørvisheiðurslønina hjá Norðurlandaráðnum 2020 fyri sítt stóra íkast til at granska og miðla lívfrøðiliga margfeldið í Føroyum.
Nevndin metti, at Jens Kjeld Jensen er eitt fyrimyndarligt dømi um, hvussu nógv ein ektað eldsál kann avrika. Í meira enn 40 ár hevur hann ótroyttiligur sett fjølbroytnið í føroysku náttúruni á breddan.
Í vikuni fekk Jens Kjeld eisini eina viðurkenning og heilsan við á vegnum frá borgarstjóranum í Havn. Annika Olsen segði m.a., at hon var ómetaliga stolt av, at tað hesaferð var ein borgari í Tórshavnar kommunu, sum fekk heiðurslønina.
Borgarstjórin takkaði Jens Kjeld fyri áhaldandi at miðla og upplýsa um náttúruna í kommununi, umframt eisini at ávara um ta hóttan, sum fremmandar plantur og dýr kunnu hava á okkara viðkvomu náttúru.
Og so fingu tey annars eitt gott prát um handfaring av planting og vespum og øðrum góðum í kommununi.
Um tú veitst okkurt, sum VP ikki veit - skriva so til vp@vp.fo