Hagstovan: Fólkatalið var 54.072 tann 1. juli í ár. Tað vaks við 698 fólkum ella 1,3% seinasta árið.
Vøksturin er minni enn í undanfarna tíðarskeiði, tá hann var 1,5%.
Vøksturin kemur av burðaravlopi á 163 og nettoflyting á 535.
Størstu kommunurnar vaksa mest í tali
Størsti vøkstur í tali seinasta árið var í Tórshavnar kommunu, har umleið helvtin av samlaða vøkstrinum var. Eisini vaks fólkatalið nógv í millum annað í Klaksvíkar og Runavíkar kommunu umframt í Nes, Eiðis og Sunda kommunu. Størsta minking var í Sands, Hvalbiar, Sørvágs og Sumbiar kommunu.
Í fleiri kommunum er fólkatalið nú tað hægsta, tað hevur verið, síðani byrjað varð at gera fólkatalið upp í 1985: Í Tórshavnar kommunu, har fólkatalið nærkast 23.000, í Klaksvíkar kommunu, har fólkatalið hevur rundað 5.400, og í Runavíkar kommunu, sum nú hevur fleiri enn 4.300 íbúgvar. Afturat teimum kunnu nevnast Sjóvar, Sunda, Eiðis og Vága kommuna. Í talvuni niðanfyri sæst fólkatalið í hvørjari kommunu við tilhoyrandi bygdum 1. juli 2021 og 2022.
Um tú veitst okkurt, sum VP ikki veit - skriva so til vp@vp.fo