Tórshavnar kommuna: Lisbeth Solmunde Michelsen er ferðaleiðari hjá Sunds Y’s Men’s Club, ein felagsskapur sprottin úr donsku fólkakirkjuni, hvørs endamál er at stuðla kristiligum barna- og ungdómsarbeiði og øðrum kirkjuligum og sosialum endamálum.

Ferðalagið hevur eina sera fjølbroytta skrá. Í dag hevur verið vitjað í Havn, m.a. á Ráðhúsinum og í Móttøkuhúsinum, har borgarstjórin var vertur og greiddi frá um stóra listasavnið hjá Tórshavnar kommunu. Eisini vitjaðu tey í Vágsbotni.

Vitjast skuldi eisini á Skansanum, í Norðurlandahúsinum, Heinesens húsi og í Mariukirkjuni. Í morgin gongur leiðin í Eysturoynna, hósdagin undir Vestmannabjørgini og fríggjadagin m.a. til Kirkjubøar.

Lisbeth Solmunde Michelsen hevur verið prestur í Danmark í mong ár. Hon er kend sum fyrilestrarhaldari og eitt nú fyri at hjálpa Magrethu drottning at týða hennara røður til føroyskt.

Hon er eisini kend í Danmark fyri at møta til fermingar í føroyskum klæðum og at syngja føroyskar sangir fyri konfirmantunum.

Um munin millum føroyingar og danir skrivar Kristeligt Dagblad, at “Hun har i et interview udtrykt det sådan, at færinger er i naturens vold og derfor meget inderligt religiøse, mens danskeres langt mere sekulære religiøsitet ligner deres forhold til veje: Hvis de er snoede, så retter man dem ud.”

Undirhaldandi og skemtiligur ferðaleiðari, halda tey donsku vitjandi. Hon er ferðaleiðari saman við manninum Carsten, sum er fyrrverandi dómari í Føroyum.