Løgtingið hevur í dag einmælt samtykt lógina um framtíðarfulltrú, ið er ein nýggj føroysk lóg, ið styrkir um sjálvsavgerðarrættin hjá hinum einstaka.

Ein framtíðarfulltrú verður stovnað, meðan ein enn er frískur og førur, men ikki sett í gildi, fyrr enn umstøðurnar eru soleiðis, at ein hevur tørv á hjálp til fíggjarligu- og persónligu viðurskiftini.

Landsstýriskvinnan í almannamálum fegnast um, at eitt samt løgting tók undir við málinum.

- Nú verður tað møguligt hjá okkum øllum at stovna eina framtíðarfulltrú, meðan vit enn eru frísk og birg, og gera sjálvi av, hvør skal taka sær av okkara  fíggjarligu og persónligu viðurskiftum, um sjúka skuldi rakt, og vit gerast ófullfør, sigur Elsebeth Mercedis Gunnleygsdóttur, landsstýriskvinna.

Talan er um eina sjálvbodna skipan og eitt tilboð til borgaran, sum sjálvur ger av, um viðkomandi ynskir at nýta skipanina.

Líknandi skipan hevur verið galdandi í øðrum londum í fleiri ár, eitt nú í Danmark, við góðum royndum, og hevur MEGD heitt á landsstýriskvinnuna um at gera eina slíka lóg fyri Føroyar.