Bruttovinningurin er vaksin stútt og støðugt seinastu nógvu árini hjá Løvubetong, sum umframt at veita betong eisini hevur kranar og aðra útgerð at brúka í byggivinnuni. Bara frá í fyrraárið til í fjør vaks bruttovinningurin við heili seks milliónum - og endaði á 27 mió kr.
Taka vit seinastu trý árini, so hevur framgongdin í bruttovinninginum verið heili 10 mió kr, uttan at útreiðslurnar til starvsfólk, sum vanliga er ein stórur postur, eru vaksnar nakað nevnivert.
Eins og bruttovinningurin setti ársúrslitið eisini met í fjør. Úrslitið áðrenn skatt vaks við nærum allari meirsøluni ella vøkstrinum í bruttovinninginum, rættari sagt. Bara avskrivingar og skattur vuksu av øllum útreiðslum í fjør, og endaliga úrslitið gjørdist 13,2 mió kr at samanbera við 8,8 mió kr árið frammanundan.
Fíggjarstøðan javnvigaði við 65,5 mió kr og eginognin var 51,2 mió kr.
Løvubetong hevur heimstað á Norðskála. Regin Jóannes Johannesen er stjóri.
Um tú veitst okkurt, sum VP ikki veit - skriva so til vp@vp.fo