Í morgin klokkan 17 verður ein stórur dagur fyri hondbólts-Føroyar, tí tá hittir landsliðið Eysturríki í Bregenz.
Men føroyska hondbóltslandsliðið varð seinkað úr Vágum og av tí sama mundi gingið galið við at sleppa víðari til Sveis, greiðir hondbóltssambandið frá á facebook.
- Við góðari hjálp frá Atlantic Airways og góða hondbóltsvininum Ásvaldi Simonsen, sum megnaðu at hála í nakrar træðrir, eydnaðist tað ferðalagnum uppá eitt hangandi hár at sleppa umborð á Swiss Air flogfarið til Zürich, verður sagt.
Ferðalagið fer við bussi úr Sveis yvir markið til Bregenz í Eysturríki, har landsliðið eisini skal venja í kvøld.
Seinasti og avgerandi dysturin hjá Føroyum í morgin, saman við úrslitinum av dystinum Ukraina – Rumenia, kemur at avgera, hvørt Føroyar koma til EM-endaspælið. Kappast verður í 8 bólkum, har nr. 1 og 2 koma víðari til EM-endaspælið, umframt 4 teir bestu 3´arnir.
Um tú veitst okkurt, sum VP ikki veit - skriva so til vp@vp.fo