Sprotin: So er fyrsta stigið at byggja brúgv millum føroyskt og japanskt komið undir land.
Hjúnini Sunnva og Hiromasa Asano hava í tvey ár arbeitt við japanskari - føroyskari / føroyskari - japanskari orðabók, og higartil hava tey fullfíggjað 10.000 leitorð í hvørjari bók.
Tað er vorðið so mikið væl umtókt hjá føroyingum at læra seg japanskt, at vit halda, at tey, ið fara undir kvøldskúla í japonskum í heyst, eiga at sleppa at arbeiða inni á Sprotanum.
Orðabókaarbeiðið heldur sjálvandi fram og bøkurnar fara at vaksa fyri hvønn dag.
Japansk vika er í Havn, japanar eru her og kunna seg um føroyska vinnu, tí nýta vit høvið beint nú. Japanskir gestir vera við til tiltakið.
Kom oman á Reinsaríið týskvøldið kl 20 til eina hugnaløtu við japonskum dámi. Hátíðarhalt saman við okkum, at vit enn ein ferð hava greipað eitt fremmant mál saman við okkara á Sprotanum.
Umframt røður og upplestur fært tú góðan tónleik og ymist gott til góman, sum Tórshavnar kommuna bjóðar.
Øll eru hjartaliga væl komin oman á Reinsaríið.
Um tú veitst okkurt, sum VP ikki veit - skriva so til vp@vp.fo