Hósdagin 22. desembur kl. 11 verður spakin settur í til nýggju stórhøllina, Føroya Arena.
Tað boðar Føroya Arena frá.
Føroya Arena verður bygd við Stórutjørn uppi í Hoyvík og er sostatt geografiskt mitt í landinum.
Høllin er við Ringvegin, sum knýtir saman nýggja innkomuvegin til Havnar frá Eysturoyartunlinum við høvuðsstaðarøkið og innkomuvegin frá Sandoyartunlinum. Sostatt fara útivið 90% av øllum føroyingum í 2023 at hava góða atkomu til stórhøllina.
Høllin skal hýsa stórum ítróttartiltøkum, konsertum, ráðstevnum, og mentanartiltøkum av alskyns slag - og ikki minst eina høll, sum hevur altjóða góðkenning til at vera heimavøllur hjá einum stórum parti av innandura ítróttagreinunum í Føroyum.
Talan er um ein heildararbeiðstøkusáttmála millum sjálvsognarstovnin Føroya Arena og Articon um bygging av eini stórhøll fyri 243 milliónir krónur.
Um tú veitst okkurt, sum VP ikki veit - skriva so til vp@vp.fo
