Tað ringasta ein nýggj donsk stjórn kann finna uppá at gera, er at veita ófíggjaðar skattalættar í báðum endum á lønarstiganum, sum fleiri av teimum uppstillaðu hava brúkt sum valagn undir valstríðnum. Tí tað kann vera sera oyðileggjandi fyri búskapin.

- Vit eru ávegis inn í eina búskaparkreppu, og hana noyðast vit at koma ígjøgnum. Tað snýr seg um at standa ímóti freistingini og ikki traðka á speedaran sigur Niels Rønholt, sum er leiðandi búskaparfrøðingur í Jyske Bank. Hann leggur afturat, at eisini almenna forbrúkið og íløgurnar mugu ikki vaksa.

- Vit mugu góðtaka, at vit skulu ígjøgnum kreppuna, sigur hann og vísir á, at vit annars kunnu enda í eini støðu við bæði vaksandi prísum og minking í búskapinum við stórum arbeiðsloysi samstundis, sonevndari stagflatión.

Aðrir búskaparfrøðingar, sum finans.dk hevur tosað við, vísa til tað sum hendi í Bretlandi, tá nýggi forsætisráðharrin Liz Truss legði fram eina ætlan sum hevði við sær stórar økingar í almennu útreiðslunum og stórar skattalættar, og fíggjarmarknaðirnir og tjóðbankin at kalla settu hana uppá pláss.