Vit ávirka ikki vindættina, men kunnu ofta seta seglini til rætta kós
- Dolly Parton

Rules

Only words with 2 or more characters are accepted
Max 200 chars total
Space is used to split words, "" can be used to search for a whole string (not indexed search then)
AND, OR and NOT are prefix words, overruling the default operator
+/|/- equals AND, OR and NOT as operators.
All search words are converted to lowercase.

Politikkur

Eftir fíggjarlógaruppskotinum skal játtanin til endurvenjing økjast við tveimum milliónum krónum næsta ár, so samlaða raðfestingin av endurvenjing higartil í valskeiðnum kemur upp á slakar seks milliónir krónur. Landsstýrismaðurin í heilsumálum leggur stóran dent á endurvenjingina, og hann er eisini fegin um nýggja tilboðið við fjarendurvenjing av krabbameinssjúklingum

Endurvenjing hevur fingið høga raðfesting, tað sum farið er av samgonguskeiðnum, og tað fær hon eisini í fíggjarlógaruppskotinum fyri 2022.

Skotið verður upp at leggja tvær milliónir krónur oman á verandi játtan, og sleppur henda upphæddin óskalað ígjøgnum fíggjarlógarviðgerðina, kemur samlaða raðfestingin av endurvenjing higartil í valskeiðnum upp á 5,6 milliónir krónur. Tí frammanundan er játtanin vaksin við 3,6 milliónum krónum – 2 milliónir krónur Í 2020 og 1,6 milliónir krónur í 2021.

Pengarnir fara millum annað til endurvenjing av krabbameinssjúklingum, parkinsonsjúklingum, giktasjúklingum, til barna-fysioterapi í Suðuroy og setan av talupedagogi (audiologopedi).

Øll trý sjúkrahúsini bjóða endurvenjing, og hvørt sær hava tey eisini síni serøki.

Væleydnað fjarendurvenjing

Tíðliga í ár fór fysioterapiin á Landssjúkrahúsinum undir at bjóða fjarendurvenjing, har sjúklingarnir heima verða vegleiddir yvir internetið og telduskíggja av einum fysioterapeuti. Tað var koronafarsóttin og allar forðingarnar fyri at savnast, sum hon hevur elvt til, ið setti gongd á hetta tilboðið, men tað vísir seg at rigga so væl, at tað ætlandi heldur fram.

Fjarendurvenjingin vendir sær serliga til krabbameinssjúklingar, men kann sum meginregla brúkast til næstan alla endurvenjing. Tilboðið kemur serliga væl fyri hjá fólki, ið búgva langt frá sjúkrahúsunum, ella í aðrar mátar hava ringt við at ferðast. Fleiri teirra høvdu helst ikki tikið av tilboði um endurvenjing, var talan ikki um fjarendurvenjing.

Kaj Leo Holm Johannesen, landsstýrismaður í heilsumálum, er sera fegin um nýggja tilboðið og leggur sum heild stóran dent á, at heilsuverkið skal hava nógv, góð og fjøltáttað endurvenjingartilboð.

- Fjarendurvenjingin er eitt framúr átak, har stutt er frá hugsan til gerð – í bestu merking. Leiðslan í fysioterapiini fekk eitt gott hugskot, kanska mest tí korona forðaði teimum í at gera, sum tey plaga. Úrslitið er ein nýggjur arbeiðsháttur, sum bara kann verða til gangs fyri allar partar. Samanumtikið er íløga í endurvenjing ein tann besta íløgan, vit kunnu gera í heilsuverkinum og er til fyrimuns fyri øll: Viðgjørdir sjúklingar koma skjótari fyri seg, kroniskir sjúklingar fáa betri lívsgóðsku, fylgisjúkur verða fyribyrgdar og so framvegis. Og í seinasta enda merkir alt hetta eisini stórar fíggjarligar sparingar. So øll vinna, sigur Kaj Leo Holm Johannesen, landsstýrismaður.

Um tú veitst okkurt, sum VP ikki veit - skriva so til vp@vp.fo