Tað er ein long røð av feløgum sum spjaða til metúrslitið hjá einum av heilt stóru fyritøkunum innan føroyska fiskivinnu, Palla hjá Mariannu, við heimstaði í Norðhavnini í Klaksvík.
Felagið er móðirfelag fyri virksemið hjá Rasmussen monnunum í Klaksvík, har Kristian Martin Rasmussen er nevndarformaður og Jan Petersen er stjóri.
Palli hjá Mariannu eigur allan partapeningin í Christian í Grótinum og Norðborg, Larsen Danish Seafood í Týsklandi, umframt bakarínum Amarant og so smærri ognarpartar í fleiri øðrum virkjum, eitt nú Vesturskin, Northpelagic og Pelagos.
Í frágreiðingini sigur leiðslan, at felagið í 2019 hevur goldið nærum 49 mió kr í tilfeingisgjaldi umframt 19 mió kr í partafelagsskatti, ella nærum 70 mió kr í skatti og avgjøldum.
Í fíggarstøðuni sæst eisini, at virksemið í Týsklandi hevur ikki verið heilt sum ætlað.
- Sølan lækkaði við 139 mió kr, og høvuðsorsøkin er, at sølan hjá niðursjóðingarvirkinum í Týsklandi lækkaði fyri 164 mió kr.
Fíggjarstøðan hjá konsernini javnvigar nú við meira enn einari milliard krónum.
Um tú veitst okkurt, sum VP ikki veit - skriva so til vp@vp.fo