Jenis av Rana, landsstýrismaður, hevur sent uppskot til Løgtingslóg um broyting í løgtingslóg um kringvarp út til hoyringar.

Um orsøkirnar til uppskotið, sigur mentamálaráðharrin, at málið verður tikið upp, tí mett verður, at tørvur er á at broyta ávísar ásetingar í galdandi lóg um kringvarp.

- Sambært samgonguskjalinum skal kringvarpslógin endurskoðast.

- Við uppskotinum verða tí gjørdar broytingar við atliti at val av stýri og kringvarpsgjaldinum.

- Í sambandi við at tryggja óheftni verður skotið upp, at farið verður frá einum politiskt tilmæltum stýri, eins og tað ikki skal bera til at kæra fyrisitingarligar avgerðir hjá Kringvarpinum til politiska myndugleikan.  

- Síðan skipanin við kringvarpsstýri varð sett í verk í 2007, er nógv hent á miðlaøkinum, og tað er ikki minni týdningarmikið í dag at hava væl skikkað umboð við viðkomandi førleikum til at leiða stovnin í tíðum við nógvum rembingum og broytingum í miðlaheiminum.

- Miðlaheimurin er margfeldur og merktur av tøkniligari menning og konvergensi ella athalli. Leiðsluroyndir og vitan um miðlaheimin og samspælið millum miðlar og samfelag eru gagnlig til at reka ein public service-stovn sum Kringvarp Føroya skynsamt og mennandi.

- Skipanin við stýri verður í uppskotinum tillagað, so stýrið verður minni tongt at politisku skipanini, t.e. at polistiska ávirkanin verður minkað, og tann fólksliga ávirkanin verður styrkt.

- Hildið verður, at spurnartekn kann setast við, hvussu óheftur stovnurin er av politisku skipanini, tá politisku flokkarnar skulu velja umboð í stýrið.

Sí uppskotið her