Tórshavnar kommuna:  Heilsuhjálparafelag Føroya skipaði í morgun fyri almennari ráðstevnu í Norðurlandahúsinum, um sálarheilsuna á arbeiðsplássinum. Yvirskriftin var “Í Hond og Ond! Ein ráðstevna um sálarheilsu á arbeiðsplássinum.”

Nú eldraøkið hevur verið kommunalt síðan 1. januar 2015, og sálarliga arbeiðsumhvørvið er komið í føroyska lóggávu, ynskti Heilsuhjálparafelagið at taka pulsin av støðuni.

Eldraøkið hevur stórar avbjóðingar við rekruttering av starvsfólkum og at fasthalda starvsfólkum, og tí er neyðugt at venda sjóneykuna á tað sálarliga arbeiðsumhvørvið og fáa lýst tað fakliga væl og at finna loysnir.

Leiðandi serfrøðingar og lyklapersónar í føroyska og danska heilsuverkinum, har ímillum borgarstjórin í Havn, viðgjørdu evnið.

Mary Anthonsdóttir beyð vælkomin og Heðin Mortensen, borgarstjóri, setti ráðstevuna. Aftaná helt danski sálarfrøðingurin, rithøvundurin og kendi fyrilestrarhaldarin, Helen Eriksen, fyrilestur við evninum “ frá forráan og sjúkramelding til trivna og sunt arbeiðsumhvørvi”.

Torbjørn Klitmøller Hollmann, formaður fyri sosial- og heilsugeiran, limur í politisku leiðsluni í FOA, helt síðan fyrilestur um nýggja eldralóg í Danmark, og um betri trivna fyri starvsfólk og umsorgan fyri borgarunum.

Heri á Rógvi helt fyrilestur um sálarliga arbeiðsumhvørvið, Per Lange. Fakligur stjóri í FOA, helt fyrilestur um trípartasamstarv og Erika Hayfield helt fyrilestur um umsorgan og fakliga viðurkenning.

Bjarni Prior, borgarstjóri í Vága kommunu, helt fyrilestur, hann kallaði “Skít og míg og traðka uppí – tað tú sár er tað tú heystar”. Og at enda helt Mona Maria úr Fugloy, sjúkrarøktarfrøðingur, fyrilestur um sárligt arbeiðsumhvørvi og trivna sum samskapan og felagsskap.

Sí myndir her