Ein lógarbroyting skal gera, at fyritøkur kunnu draga negativar rentur frá í skattskyldugu inntøkuni.
Tað ætlar Jørgen Niclasen, landsstýrismaður í fíggjarmálum. Hann hevur lagt uppskot fyri Løgtingið. Tað kemur til 1. viðgerð næsta týsdag.
TAKS hevur sagt, at soleiðis sum lógir og reglur eru, kunnu negativu renturnar ikki dragast frá, tí tær eru ikki ein neyðug útreiðsla fyri at økja um ella halda fast við tær inntøkurnar sum ein fyritøka hevur.
Men tað skal broytast, so negativu renturnar ikki raka fyritøkurnar, sum eiga pening á bók, dupult, vil Jørgen Niclasen.
Hinvegin kann so roknast við, at frádrátturin fer at gera, at landskassin fær minni inn í partafelagsskatti.
Um tú veitst okkurt, sum VP ikki veit - skriva so til vp@vp.fo