Russiska ávirkanin á afrikanska kontinentinum veksur alsamt, og sæst ikki minst aftur í hesum døgum, nú ein stór hernaðarvenjing verður hildin í Indiska havinum har Suðurafrika er vertur.

Umframt Russland er Kina eisini við í venjingini. Russiska herskipið Admiral Gorshkov (myndin) er við í venjingini. Skipið er sera framkomið og hevur eitt nú sonevndar hypersoniskar rakettir sum kunnu flúgva fimm ferðir skjótari enn ljóðið ferðast og røkka yvir 1.000 kilometrar.

Bæði ES, USA og Ukraina hava funnist at Suðurafrika fyri at leggja hav til venjingina og eisini vera vertur, men Suðurafrika, sum annars hevur nógvan samhandil við vesturheimin, hevur konsekvent noktað fyri at taka frástøðu frá Russlandi og krígnum í Ukraina. Suðurafrika var eisini eitt av teimum 35 londunum, sum í mars í fjør ikki var við í ST yvirlýsingini sum fordømdi russisku innrásina í Ukraina.

Suðurafrikanski forsetin Cyril Ramaphosa úr flokkinum Afrikan National Congress (ANC) hevur enntá alment sagt, at tað er Nato sum er orsøkin til kríggið í Ukraina.