Russiski foresetin Vladimir Putin brúkar hermenn úr fátækum familjum sum kanónføði í stríðnum í Ukraina. Higartil hava umleið 15.000 russiskir hermenn latið lív í bardøgunum. Tað segði stjórin fyri bretsku fregnartænastuni MI6 Richard Moore, á ráðstevnuni Aspen Security Forum sum er í Colorado í USA í hesum døgum.
Hermenninir sum stríðast í Ukraina eru rekrutteraðir ímillum etniskar minnilutar og fátækar russar og í minni mun hjá miðalklassanum í Moskva og Sankta Pætursborg.
Bretski fregnartænastustjórin segði eisini, at russiski herurin er um at missa ondina og helst fer at brúka komandi vikurnar til at summa seg.
- Tað er gylti møguleikin hjá Ukraina at herja á og staðfesta stríðsviljan og halda fast í høga moralinum, segði bretski njósnarastjórin millum annað.
Um tú veitst okkurt, sum VP ikki veit - skriva so til vp@vp.fo
