- Borgarliga samgongan hevur skapt tryggar karmar fyri fiskivinnuna. Vit hava longu sæð avleiðingarnar: Milliarda íløgur í framfýsin veiðitól og framleiðsluvirkir á landi, segði Christian Andreasen, formaður í Fólkaflokkinum í dag undir viðgerðini.

- Við støðugum kørmum næstu áratíggjuni kann fiskivinnan skapa vøkstur í inntøkunum og gera sítt til at vaksa um samfelagskakuna. Og harvið vil Landskassin eisini fáa ein vaksandi fíggjarligan ágóða.

- Júst her er aðalmunurin millum borgarligan politikk og útmeldingarnar hjá andstøðuni. Andstøðan hevur bert eittans svarið – at brandskatta vinnuna fyri at kunna fremja størri umfordeiling.

- Altso taka meira inn i skatti og avgjøldum frá borgarum og vinnu, alt til almenna útgjaring.

- Javnaðarflokkurin hevur longu boðað frá, at hansara vinstravendi politikkur fer at vera ein “útjavningarpolitikkur”.

- Tað hevði tænt Javnaðarflokkinum nógv betri at verið meira ábyrgdarfullur í sínum útmeldingum um karmarnar um vinnuna, heldur enn við sínum útmeldingum at skapa veruligan ótryggleika í føroysku vinnuni.

- Í almennum viðmerkingum sínum til Ólavsøkurøðuna boðaði formaðurin fyri Javnaðarflokkin frá, at avgjøldini á framfýsnu alivinnuna skula tvífaldast, stendur tað til Javnaðarflokkin. Úr 5% upp í 10% av framleiðsluvirðinum.

- Borgarligur politikkur er júst tað øvuga av tí sum Javnaðarflokkurin stendur fyri.

- Borgarligur politikkur er at eggja til og í verki skapa bestu fortreytirnar fyri búskaparvøkstri.

- Økt framleiðsla er einasta gongda leiðin at vaksa um samlaðu úrtøkuna fyri samfelagið. Bert við øktari framleiðslu verður meira til øll.

- Seinastu 12 árini er samlaða framleiðslan í Føroyum tvífaldað. Fólkaflokkurin hevur sitið við róðrið meginpartin av hesum tíðarskeiði.

- Ongin blívur ríkari av umfordeilingspolitikki. Øll blíva fátækari.

- Eitt tað ringasta sum kann henda fyri føroyska samfelagið er um ein vinstravend samgonga undir leiðslu av Javnaðarflokkinum kemur til valdið í Føroyum. Vinstravendur politikkur tekur máttin úr øllum vøkstri og hevur altíð við sær afturgongd.

- Vónandi hava fólk heldur ikki gloymt tann hurlivasa, sum gjørdi seg galdandi undir seinastu samgongu, sum varð eyðkend av rumbli og maktarloysi frá fyrsta degi, segði Christian Andreasen, formaður Fólkafloksins.