Harðskapurin, sum seinastu árini er farin at eyðmerkja arbeiðið hjá politinum alt meira, var nærum ongin hetta vikuskiftið. Vakthavandi á politigarðinum í Havn upplýsir, at burtursæð frá einum máli fríggjakvøldið, sum í løtuni verður kannað nærri, so var púra friðarligt, hóast nógv fólk var í býnum.
- Men tað vóru vit eisini, og tað vísir seg at kyrra um tað skuldi verið onkur ósemja á veg, sum seinni kundi enda við einum harðskapsmáli, sigur vakthavandi.
Ein bilførari varð tikin í Eysturoynni síðstu nátt fyri rúsdrekkakoyring.
Tað sum gjørdi hetta vikuskiftið øðrvísi enn so mong onnur var, at ein lívleysur maður varð funnin á Eystaruvág í Havn í gjár. Líksýn skal gerast av manninum, men fyribils er onki sum bendir á, at nakað brotsverk er framt í hesum sambandinum.
Um tú veitst okkurt, sum VP ikki veit - skriva so til vp@vp.fo