Ætlanin er at Jákup Sverri og Magnus Heinason skulu í hesum mánaðinum út at "kalibrera", sum tað verður rópt, og verður hetta seinasta uppgávan hjá Magnus Heinason, áðrenn skipið verður selt.

Jákup Sverri og Magnus Heinason skulu tóva á sama strekki, til tess at vita, hvat nýggja skipið fiskar í mun til tað gamla.

Sambært heimasíðuni hjá Havstovuni frá 9. desember 2020, so fór Jákup Sverri tá fyrsta rannsóknartúrin fyri Havstovuna. Á hesum fyrsta túrinum var endamálið at kanna brisling í Tangafirði og á Skálafjørðinum.

Frá brislingatúrinum var seinni sagt at mest brislingur var at síggja í djúpasta partinum av Skálafjørðinum, frá Saltnesgrynnuni inn til Skipanes. Í Tangafirði var eisini mest at síggja har tað var djúpast, tó við einum undantaki út fyri Morskranes, har ein torva stóð á heilt grunnum vatni. Tað var heldur minni av brislingi í Tangafirði sammett við Skálafjørðin.

Brislingurin stóð í smáum torvum nær botni um dagin og lyfti seg frá botni í skýmingini og loystist heilt upp í nærum allari vatnsúluni um náttina.

Brislingurin var smáfallandi, miðallongdin var 7,1 cm, og mett verður at tað mesta er frá ársins gýting.

Hetta er triðja árið, at Havstovan ger kanningar av brislingi á føroysku firðunum.