Vágs kirkja fær sunnudagin 4. septembur vitjan av nýggja prestinum í oynni Hanus Pál Jógvansson, sum fyribils er settur sóknarprestur komandi árið.
Og í hesum sambandið hevur kirkjuráðið saman við sunnudagsskúlanum í Meinigheitshúsinum skipað soleiðis fyri, at tað verður morgunmatur kl. 10.00 í Meinigheitshúsinum og síðani guðstænasta kl. 11.00 í kirkjuni, har Hanus Pál umframt stutta prædiku eisini hevur eitt orð til børnini, umframt at tveir sunnudagsskúlasangir verða sungnir. Av tí at samlast verður til morgunmat og guðstænastu, so er eingin sunnudagsskúli seinnapartin.
- Øll eru vælkomin til morgunmat og guðstænastu og skuldi nakar ivast, so er tað ókeypis, siga tey í Vági, Hans Pál Jógvansson letur eisini heilsa, at hann gleðir seg til at hitta vágbingar og vitjandi sunnumorgunin til morgunmatin í Meinigheitshúsinum og til guðstænastuna í Vágs kirkju.
Um tú veitst okkurt, sum VP ikki veit - skriva so til vp@vp.fo