MB hevur sett danan Kristoffer Kvistgaard í fulltíðarstarv sum høvuðsungdómsvenjara hjá felagnum.
Kristoffer er 29 ár og hevur UEFA A venjaraprógv umframt aðrar viðkomandi útbúgvingar. Hann hevur eisini 12 ára royndir sum venjari, og hevur hann hesa tíðina vant børn, ung, menn og kvinnur.
Seinastu árini hevur Kristoffer verið venjari hjá gentum og kvinnum á høgum støði.
MB skrivar, at felagið herfyri søkti eftir einum høvuðsungdómsvenjara at starvast fulla tíð í 2020.
- Stórur áhugi var fyri starvinum, og vit funnu ein, ið vit meta hóskar væl til okkara tørv og okkara mentan, sigur MB.
- Hjá Miðvágs Bóltfelag fara vit framvegis at leggja dent á, at pláss er fyri øllum og at møta hvørjum einstøkum leikara við hóskandi avbjóðingum. Vit fara framhaldandi at halda tann sunna og góða felagsskapin við líka. Tann stóri munurin frameftir verður, at eitt starvsfólk er sett at røkja hesar og fleiri aðrar uppgávur, og hetta eru vit sera fegin um, sigur felagið at enda.
Um tú veitst okkurt, sum VP ikki veit - skriva so til vp@vp.fo