Í kvøld, fríggjadagin 6. november er seinasta umfar í 1. deild á skránni, og í morgin, leygardagin 7. november endar landskappingin í Betri Deildini hjá monnum.
Í tí sambandi heitir Fótbóltssamband Føroya á allar áskoðarar um at halda frástøðu, og at eingin óviðkomandi fer inn á vøllin, tá dómarin floytar av. Hetta fyri at verja spælarar, dómarar og hvønn annan ímóti møguligari koronasmittu.
Flestu feløg hava spælarar, sum skulu uttanlands við landsliðum í næstum, eins og fleiri feløg skulu spæla steypadystir seinni í hesum mánaðinum. Tí hevur tað stóran týdning, at vit saman ansa eftir, so eingin verður útsettur fyri koronasmittuni.
Heimafelagið hevur ábyrgd av trygdini í samband við dystir, men hervið verður heitt á øll um at verða viðvirkandi til, at seinastu dystirnir kunnu avgreiðast undir tryggum kørnum.
Fótbóltssamband Føroya
Um tú veitst okkurt, sum VP ikki veit - skriva so til vp@vp.fo
