Frá 2009 og fram til nú eru ómaksgjøldini hjá donsku bankunum hækkað nógv meira enn onnur brúkaragjøld, tað vísir kanning sum Brúkararáðið Tænk hevur gjørt.
Sum dømi verður nevnt, at tað lættliga kann kosta yvir 20.000 krónur at taka eitt realkredittlán uppá tríggjar milliónir krónur - og tað er bara í ómaksgjøldum.
Men felagið hjá donsku fíggjarstovnunum vísir á, at samstundis sum ómaksgjøldini eru hækkað, so er rentan lækkað, so samanum tikið rinda fólk ikki meira til bankan enn tey plagdu.
Ráðini frá brúkararáðnum eru at kanna væl hvørji brúkaragjøld ein rindar, og so gera av antin einum nýtist júst ta tænastuna. Ein annar møguleiki er at tingast við ráðgevan og vita, um ein kann sleppa undan onkrum gjaldi ella møguliga sleppa bíligari.
Føroysku bankarnir eru partur av danska bankakervinum, men tað er óvist um teir eru við í júst hesi kanningini hjá Tænk.
Um tú veitst okkurt, sum VP ikki veit - skriva so til vp@vp.fo
