Í kunngerðini um fiskiskap eftir makreli 2020 eru 2.815 tons sett av til vinnuligar fiskiveiðiroyndir við umsóknarfreist mikudagin 3. juni 2020.
Fiskimálaráðið fekk 22 umsóknir um part av hesi kvotu – tilsamans var søkt um 13.500 tons. Eftir innanhýsis viðgerð, og í samráð við Havstovuna, eru 10 umsóknir játtaðar, tilsamans 2.815 tons av makreli.
Í viðgerðini og í raðfestingini av umsóknunum er serligur dentur lagdur á menningarvirði og møguligt nýskapanarvirði í royndunum, umframt virðisøking av veiðuni, sigur Fiskimálaráðið.
Kvotur og kvotapartar, sum ikki eru nýttir í ár, falla aftur til Fiskimálaráðið pr. 31. desember og kunnu ikki leingjast til næsta ár.
Frágreiðingar skulu sendast Fiskimálaráðnum, tá royndirnar eru gjørdar, í seinasta lagi 31. desember 2020.
Um tú veitst okkurt, sum VP ikki veit - skriva so til vp@vp.fo