Nýggja bókin "Glottar úr trolarasøguni" er komin í bókabúðirnar. Óli Olsen úr Klaksvík, búsitandi á Argjum, hevur skrivað.
Umrøddir verða stívliga 60 føroyskir síðutrolarar - frá Lord Alfred Paget í 1905 til Magnus Heinason í 1961. Myndir eru av teim allar flestu.
Sjálvt av norska trolaranum, Trawlfisk, sum Sámal Petur Petersen (Gamli Sámal Petur) í Fuglafirði átti í, eydnaðist at fáa mynd. Trolarin sigldi í 1922 út frá Fuglafirði.
Fyrstu mongu trolararnir vóru kolfýrdir, síðan komu teir oljukyndu og seinni aftur motortrolararnir.
Í høvuðspartinum "Minnisbrot úr trolaralívi" verður mangt og hvat tikið fram. Eitt nú greiðir Svenning Johannesen, skipari á sørvágstrolaranum Vesturskini, frá, tá ið báturin við kjokkfullari saltfiskalast legði seg á Barðinum ávegis á Sørvág. Teir vóru um at ganga burtur.
Um tú veitst okkurt, sum VP ikki veit - skriva so til vp@vp.fo
