Hvørki fyri harðskap í hjúnarlagnum ella barnapíning, men hjúnarbandslógin skal reinsast fyri samkynd.
Hetta var boðskapurin frá formanni Miðfloksins, Jenisi av Rana, aftaná valið, og inngangur hansara til samgongusamráðingarnar.
Hjúnalag millum samkynd er ein spilt vøra ella ein rotin vøra, nakað soleiðis orðaði hann seg.
Henda hatursatsókn var nevnd fleiri ferðir í almenna rúminum.
Eisini nevndi hann, at tað vóru nógvir hættir at fremja slíkt.
Tigast kann ikki við afturvirkandi megi, og eingin umbering er komin frá atsóknarmanninum fyri niðrandi og hóttandi talu.
Eftir mínum tykki er hetta ókristilig herferð og beinleiðis brot á §266b, har sagt verður, at hóttandi,háðandi ella niðrandi umrøða vegna kynsliga orientering er revsiverd.
Nú er eitt høvi at royna §266b í Føroya Rætti.
Tá hugsað verður um atburðarlag Miðfloksins í spurninginum um LGBT-fólk sum heild, og reinsing av hjúnarbandslógini er nýggja hatursherferðin, so er ikki langt til, at svarta samgongan fer at strika §266b í revsilógini.
So verið á varðhaldi øll, ið vilja verja vunnin rættindi, og sláið manngarð um tey samkyndu.
Karin Kjølbro
Hetta er eitt lesarabræv. Meiningar og sjónarmið í lesarabrævinum eigur tann ið skrivað hevur. VP leggur nógv í talu- og skrivifrælsi. Tí eru allar meiningar vælkomnar, bara tær eru innanfyri karmarnar á revsilógini og fjølmiðlaetisku leiðreglunum. VP loyvir í ávísan mun dulnevndum lesarabrøvum, tá veit redaktiónin hvør hevur skrivað.
Um tú veitst okkurt, sum VP ikki veit - skriva so til vp@vp.fo
