1. februar næsta ár fær føroyska løgreglan nýggjan høvuðsákæra. Talan er um Katrin Thorsvig Hansen sum í dag starvast sum stjóri í Dátueftirlitinum.
Høvuðsákæri er tað sum áður kallaðist varafúti.
Katrin Thorsvig Hansen hevur drúgvar royndir, bæði á Løgmansskrivstovuni, í danska Løgmálaráðnum og hevur eisini eitt skifti í 2018 virkað sum ákæri við Føroya rætt.
Michael Boolsen, fúti, sigur í tíðindaskrivi, at hann gleðir seg til samstarvið við Katrina, sum hann kennir sum ein "gløggan løgfrøðing við einum menniskjaligum skálkabrosi".
- Umframt at hava revsimálini um hendi fer hon eisini at hjálpa okkum við nógvu verkætlanunum, sum vit hava í gongd, sigur Michael Boolsen, fúti (leystliga umsett) í tíðindaskrivinum.
Um tú veitst okkurt, sum VP ikki veit - skriva so til vp@vp.fo
