Hevur tú umhugsað at granska eftir lesnaðin? Ella ert tú bara forvitin at vita meira um, hvørjar møguleikar tú hevur at fara undir nýggjar verkætlanir?

Mánakvøldið 6. mars verður kunningartiltak í Føroyahúsinum í Keypmannahavn um møguleikar fyri at søkja um fíggjarligan stuðul til gransking og menning. Tað eru MFS og Granskingarráðið, sum skipa fyri.

Á tiltakinum verður kunnað um møguleikar fyri at søkja um stuðul úr Granskingargrunninum til verkætlanir, sum hava tilknýti til Føroyar ella sum hava týdning í føroyskum høpi.

Eisini verður kunnað um møguleikarnar fyri at søkja um stuðul úr Horizon 2020, sum er granskingargrunnurin hjá ES kommissiónini. Føroyar hava atlimaskap í Horizon 2020 og gevur hetta góðar møguleikar t.d. at koma til Føroya við fíggjarligum stuðli úr Horizon 2020.

Á skránni verða framløgur við Anniku Sølvará, stjóra í Granskingarráðnum og Mariu Húsgarð, NCP-samskipara.

Eisini verður høvi at hoyra um ítøkiligar royndir við at søkja stuðul og at vera ph.d.-lesandi frá Louise Meier Carlsen, sum er innskrivað til ph.d.-lestur á Københavns Universitet, og undirvísir og granskar á Fróðskaparsetrinum.

Aftaná verður møguleiki at seta spurningar og at umrøða ítøkiligar ætlanir.

Tú kanst siga frá, at tú er áhugað/ur í tiltakinum: trýst her