Tað er ein góð forrætning at selja tollfrítt á flogvøllinum. Tað er onki nýtt, men nýggjasti roknskapurin hjá partafelagnum Duty Free vísir, at hugurin at keypa hjá vaksandi talinum á teimum sum ferðast um flogvøllin av álvara fær tað at fløða inn í kassan hjá eigarunum, sum eru almennu feløgini Vága Floghavn og Atlantic Airways.
Úrslitið eftir skatt í fjør var nærum 17 milliónir krónur, ella góðar tvær milliónir meira enn árið framman undan.
Eigararnir fáa 18 milliónir krónur í vinningsbýti fyri árið í fjør.
Í frágreiðingini sigur leiðslan, at sølan og úrvalið hevur verið vaksandi øll árini síðani 2014, tá handilin lat upp.
- Dentur verður lagdur á, at søluvørurnar í handlinum eru eitt vet bíligari enn hjá kappingarneytunum, sum eru teir útlendsku flogvallirnir, serliga flogvøllurin í Kastrup verður sagt.
Ein alsamt størri partur av søluni er eisini á netinum:
- Talið av bíleggingum á heimasíðuni er vaksandi og í 2019 var talan um 7.800 bíleggingar. Talið av bíleggingum á heimasíðuni í 2018 var 5.750.
Korona smittan hevur tó eisini funnið leið inn í roknskapin hjá partafelagnum Duty Free, og sagt verður, at ávirkanin fer at síggjast aftur í søluni hjá handlinum í 2020.
Um tú veitst okkurt, sum VP ikki veit - skriva so til vp@vp.fo