Tryggir og góðir møguleikar at menna handilsvinnuna, útbúgvingarumhvørvið og ferðavinnu. Og fram um alt ein livandi og fjølbroyttur miðbýur við nógvum upplivingum til gagns fyri borgarar í øllum aldri.
Fríggjakvøldið kl.19.30 verður borgarafundur um miðbýarætlanina í Posthúskjallaranum í Tórsgøtu.
Birita Wardum, býararkitektur, fer at kunna og greiða frá um miðbýarætlanina, sum Tórshavnar kommuna í hesum døgum almannakunnger.
Miðbýarætlanin er kommununnar uppskot til eina ætlan fyri miðbýin. Stungið verður út í kortið yvirskipaðu hugsanirnar um henda býarpart. Í ætlanini eru ítøkilig uppskot, sum menna og endurnýggja miðbýin – bæði bygningar, øki og vegir. Her eru smá tilboð í gerandisdegnum og stórar verkætlanir, sum verða framdar 10-15 ár frammi í tíðini.
Miðbýarætlanin verður endurskoðað javnt og samt soleiðis, at mál og mið støðugt eru dagførd og hóska seg til nútíðina.
Heðin Mortensen, borgarstjóri, bjóðar vælkomin, og Tróndur Sigurðsson, formaðurin í byggi- og býarskipanarnevndini, fer eisini at siga nøkur orð.
Um tú veitst okkurt, sum VP ikki veit - skriva so til vp@vp.fo