Alireza Firouzja er bert 18 ára gamal og er ættaður úr Iran. Hann bleiv stórmeistari fyri fleiri árum síðan.
Men hóast tað eru 1000 talvstórmeistarar í heiminum, hava bert 14 telvarar áður megnað, at rokkið einum styrkitali omanfyri 2800.
Firouzja hevur verið flúgvandi innan telving í ár. Seinastu dagarnar hevur hann vunnið 8 av 9 møguligum stigum í European Team Chess Championship.
Hetta gevur honum eitt styrkital uppá 2803!!
Firouzja setti í vikuskiftinum harvið met, tí hann er yngsti telvari ið hevur rokkið 2800 í styrki. Hann er nú nr. 2 á heimsstyrkilistanum.
Norski heimsmeistaran Magnus Carlsen hevur hægsta styrkitalið.
Komandi fríggjadag byrjar annars HM dysturin millum Carlsen og russaran Nepo í Dubai.
Russiski avbjóðarin er við styrkitalinum 2782 nr. 5 á styrkilistanum.
Men fleiri vænta, at Firouzja vinnur kandidatkappingina í 2022 og verður harvið næsti avbjóðarin til HM dystin.
Sum gongdin er nú kann hann væl gerast yngsti heimsmeistarin í søguni.
Men Alireza Firouzja bjóðar ikki bert av tá talan er um telving. Hann hevur sett seg upp ímóti valdsharrunum í heimlandinum Iran, av tí at stjórnin har hevur noktað sínum telvarum at telva móti ísraelskum telvarum.
Firouzja flutti í 2019 til Fraklands har hann søkti um og fekk franskan ríkisborgararætt. Síðani juli í ár hevur iranska stjørnuskotið telvað undir fronskum flaggi.
Um tú veitst okkurt, sum VP ikki veit - skriva so til vp@vp.fo