Tað fer ongin sonevndur shuttlebussur at koyra til og úr Tjørnuvík í summar. Tað sigur Jógvan Kruse, borgarstjóri við VP. 

Fólk hava annars givið ilt av sær, tí ov nógvir bilar og bussar eru í bygdini viðhvørt, so sannur ruðuleiki valdar.

- Vit høvdu eina royndarskipan í fjør við bussi sum koyrdi ímillum, men tað vóru ov fá sum brúktu bussin í mun til tað sum skipanin kostaði kommununi, sigur Jógvan Kruse. Tí verður hendan skipanin ikki aftur í ár.

- Men vit brúka ljósreguleringina aftur í ár, og vit hava stytt um bæði strekkið og tíðina sum fólk skulu bíða, sigur borgarstjórin. Hartil er skipanin við fráboðan um, hvussu nógvir parkeringsbásar eru tøkir í Tjørnuvík aftur virkin í ár. Henda skipanin sigur bilførarum frá støðuni í Tjørnuvík, longu tá teir koma til Haldórsvík, sigur Jógvan Kruse.

- Men atfinningar hava eisini verið ímóti hesi skipanini, og sagt verður, at hon vísir ikki altíð rætt.

- Ja, tað er so ikki okkara royndir. Vit hava kannað skipanina fleiri ferðir í seinastuni, og tá hevur hon víst rætt, sigur Jógvan Kruse, borgarstjóri í Sunda Kommunu. 

Hann leggur afturat, at tað er serliga góðveðursdagarnar, tá fólk hava frí, at tað kann vera eitt sindur ruðuleikakent í Tjørnuvík.

- Nakrir slíkir dagar hava verið í seinastuni, tí kennist tað kanska eitt sindur ógvusligt beint nú. Men tað eru hóast alt fleiri dagar, tá hetta ikki er ein trupulleiki, minnir borgarstjórin á.