At talan var um eitt ræðuligt mál var beinanvegin greitt, tá tað kom undan kavi, at 39 vietnamesisk flóttarfólk í oktober 2019 doyðu í eini lastbilabingju í Essex, har norðuri í Onglandi.

Júst hvussu ræðuligt málið var, er komið fram í rættinum seinastu tíðina, har teir sjey menninir, sum høvdu ábyrgdina av hendingini, sótu á ákærubeinkinum.

- Vietnamesisku flóttarfólkini liðu ein sera pínufullan og ringan deyða, segði dómarin Sir Nigel Hamilton Sweeney millum annað tá hann segði dómin.

Í rættinum kom millum annað fram, at hitin í bingjuni kom upp á minst 40 stig, ímeðan súrevnistrotið bara vaks til fólkini kódnaðu.

Undir málinum kom eisini fram, hvussu teir 7 menninir samstarvaðu um at koyra hesi og onnur flóttarfólk til Onglands. Men náttina ímillum 22. og 23. oktober í 2019 gekk tað heilt galið.

Bilførarin, sum tók ímóti bingjuni í ferjuhavnini Tilbury í Onglandi, hevði fingið boð frá føraranum sum avleveraði bilin við ferjuna í belgiska býnum Zeebrugge, at fólkini í bingjuni máttu fáa luft alt fyri eitt tá bingjan kom fram. Men tá enski bilførarin hugdi til fólkini vóru tey øll deyð.

Í rættinum kom eisini fram, at fólkini høvdu roynt at ringja heim til familjurnar í Vietnam, men hesar fingu onki gjørt.

Menninir vórðu dømdir úr 18 ára fongsulsrevsing niður í nakrar mánaðar, alt eftir hvør leiklutur teirra var.

BBC hevur meira um málið.