Í Framsókn halda vit, at Tjóðleikhúsið skal liggja miðskeiðis í Havnini. Bara soleiðis fáa vit ta samvirkan ímillum mentan, býarlív, mat- og skeinkistøð, sum vit kenna frá stórbýum úti í heimi.

Eitt boð er at leggja Leikhúsið á Skálatrøð, men tað er sjálvandi treytað av, at parkeringstrupulleikin verður loystur samtíðis.

Vit síggja eisini fyri okkum, at eitt Tjóðleikhús kann liggja á eystaru bryggju, tá núverandi virksemið á havnaøkinum flytir út í nýggju havnina.

Sjálvandi staðsett við atliti til íbúgvar og virksemi í nærumhvørvinum

Nú skal man ansa sær, ikki at leggja meiri enn gott er í, at nývaldi formaðurin í leiklistaráðnum í sendingini Nón ikki kundi lova, at Tjóðpallurin fór at liggja í Havn.

Vónandi var tað fyrst og fremst eitt atlit til arbeiðsfriðin í bygginevndini.

Hinvegin minti útsøgnin meg á tunnilsgrótsmálið; um hvussu tað kann ganga, tá man fer skeivur í fatanini av sær sjálvum, sum tann, ið situr við buktini og báðum endunum. 

Vit í Tórshavnar kommunu kunnu ikki taka fyri givið, at tað er líka innlýsandi fyri restini av Føroya fólki, at eitt komandi tjóðleikhús skal liggja í høvuðsstaðnum.

Tí má kommunan gera tað, hon kann, fyri at skapa Tjóðpallinum bestu karmar í Havn.

Tað fer ikki bara at skapa leiklistini bestu karmar, men eisini teimum leikhúsvitjandi bestu upplivingina.

Ruth Vang
valevni fyri Framsókn til Tórshavnar Býráð